DITORU DO TANGAN MANGIDO

Songgot roha nantoari manjaha WA namandok kasar ni partiga tiga di hutanta.

Mardalani ma par Jakarta tu Tao toba. Tingki mangan horong nasida naeng dipasada ma 2 meja makan. Pintor gogo ma suara ni parlapo i:" Unang lomo lomomu manarik meja i, ponggol annon pat nai", ninna.
Manaeng ditopar tentara parlapo i huhut didok :"Molo songonon do panjalomu di turis, jora ma jolma ro tuson", ninna ndang saut be dipasada meja i.

Sahali nai naeng nanuhor kaos nasida. Disungkun :" Adong dope keleur na asing inang ?". "Naadong disima pillit hamu", ninna timbo soarana.

"Diluat on ndang lakku gadison mikrofon, ala gogo ni suara", ninna sahalak.
Dialusi nasada nai muse :"Ma porlu pendidikan sopan santun diluat on", ninna.
Nijaha do muse angka supir na pintor mangalbangi sewa ni mobil tu turis na ro di bandara Silangit. Songon naso porsea do iba nean diangka barita i, ra dang sude songoni ninna roha dibagasan, niapus ate ate on.

Sipata maila hita mambege angka pambaenan ni angka partiga tiga nang parlapo di tao toba an. Sai dohot do hita nean promosi asa ro angka jolma tusan. Masude dipadenggan bandara, naeng dibaen dalan toll, adong badan Otorita. Hape gabe magopo mai sude molo so rade roha ni angka partiga tiga manomu nomu angka tamue, turis naro namboan hepeng.

Ai anggo tao manang laut na uli bahat di luat na asing, ndang holan tao toba. Ro nasida naeng mangida budaya batak, musik/ende, tortor, cindera mata nang parngoluon siapari ni halak batak na tarbarita i. Anggo tao na uli gok di luat na asing.

Molo niingot nean tung mansai burju jala sangap do hita tu tamue na ro.

Tingki dihaetehon sanga do iba dohot martiga tiga pahean di kios. Ndang hea binege gogo soara ni dainang. Gariada mangelek, ai ditoru do tangan ni na mangido.